Asteburua iritsi eta Mutrikurantz abiatu ginen, oraingoan autobusez. Bidean, batzuk musika entzuten joan ziren partidarako motorrak berotzeko asmoz; beste batzuk, aldiz, azterketarako liburuekin, nahiz eta denok jakin ez zutela ezer ikasiko. Hitz eta pitz joan ginenez, bidea motza iruditu zitzaigun, eta uste baino lehenago Mutrikun geunden.
Aldageletara sartu eta astebururo legez, aldatzen hasi ginen musika zela medio, aste osoan zehar landutako guztia praktikan jartzeko helburuarekin.
Partida oso borrokatua izan zen, nahiz eta lehenengo zatiko 4. minutuan Mirarik markagailuan aurreratu gintuen, baina, atsedenaldira 1-1ekoarekin joan ginen. Bigarren zatia nahiko motela izan zen, baina, asko borrokatu ostean, partidaren amaieran 1 eta 2koa lortu genuen. Gainera, Arizmendiko ikuskatzaile batzuk bertan zeudela konturatu ginen guk galtzeko desioarekin, baina beraien nahia ez zen bete.
Honez gain, taldekide batzuk igandean Lasartera joatea erabaki genuen, Ostadar vs. Arizmendi ikustera. Asko gozatu genuen partida izan zen, Elik batez ere. Izan ere, Arizmendik galdu egin zuen eta ondorioz, orain gu gara sailkapenean lehenenak! Orain dena gure esku dago, beraz, dena emango dugu geratzen zaigun azken txanpa honetan. Aupa Neskak!