Irailetik aurrera ere bertsoaren transmisioan jarraituko dugu bertso-eskolen bidez; bertso-saioak ere antolatuko eta sustatuko ditugu, hala nola, Pello Errota bertso-sariketa antolatuko dugu iraila eta urri bitartean, (H)arituz bertso-jaialdia izango da azaroan, eta Gure Bertso Zirkua abenduan; bertso-saioak grabatzen eta dokumentatzen jarraitzen dugu, eta emititzen, azaroan 300 programa beteko baititu (H)ari Naizela irratsaioak; eta Tolosaldeko bertsolarien ikerketa lerroa ere martxan jarri dugu, lehengoen berri izan dezagun oraingook eta gerokoek ere.
10 urtez hamaika ilusio sortarazi ditugu, eta sortzen jarraitu nahi dugu. Hitzaren harian aritzen jarraituz; hitzekin, hotsekin, erritmoarekin eta esanahiekin jolastuz; bertan eta bertatik eraginez; lehengoengandik jasotakoa ondorengoei eskainiz.
Jo ezazue txalo, bota puntua, jarri iezaguzue gaia, jarraitu bertsoa, ez isildu eta hartu parte. Animatu eta gerturatu zaitezte, bertsozaleok ematen diozue-eta honi guztiari zentzua; izan aulkian eserita, izan antolakuntzan. Ateak eta mikrofonoa zabalik.
10 urtez hamaika bertso, eta etorriko direnak!