Euskaren kale erabileran
komeni da bereiztea;
herri handien gorakada eta
arnasguneen jeistea.
Egun, hizkuntza politika da
denda txikiak ixtea,
jaiez mezatan ez elkartzea,
behiak makinaz jeztea.
Nork okupatu dute euskararen
territorio askea?
Zati bat erdal hizkuntzek eta
isiltasunak bestea.
Goizetan gaude lantokietan,
etxean arratsaldean,
gymean edo bidegorrian,
-inoiz gutxitan taldean.
Elkarri hitz egin baino nahiago
Googleri aritu galdean.
Hizkuntzak merke ta hitzak garesti
daude lehengo aldean.
Arnasguneek jarraitu baietz
oxigenoz apal, behean,
ordu gehiagoz egon ezean
plazan eta sukaldean.