Maialen Lujanbio eta Amets Arzallus bertsolariek bertso-bazkaria eskainiko dute otsailaren 19an, Adunako Aburuza Sagardotegian. Harituz Bertsozale Taldeak, Aburuza sagardotegiak eta Adunako Udalak antolatu dute ekimena eta COVID 19aren izurriaz geroztik egingo den lehenengotariko bertso-bazkaria izango da.
Bertso-bazkarirako txartelak erosteko bi modu egongo dira: bata, sagardotegian bertan erostea eta bestea, 679 628 914 telefonora deituz erreserba egin eta Bizum bidez ordaintzea. Txartel bakoitzaren prezioa 30 €koa izango da eta sagardotegiko menua eskainiko zaie bazkaltiarrei. Horrez gain, menu begetarianoa eskatzeko aukera ere izango da, betiere, txartela erosterakoan antolatzaileei horren berri emanez.
Lehen aldiz bertso bazkaria antolatzeko ahalegina iazko maiatzean egin zuen Harituzek baina osasun egoeraren harira indarrean zeuden legeek ekitaldia bertan behera uztera eraman zuten taldea. Orain, ordea, bertso bazkaria egiteko baldintza egokiak daudela iritzita, otordu bueltako bertso saioak hauspotzen laguntzeko erabakia hartu du taldeak.
