Umeentzako bertso saio partizipatiboak Harituzen eskutik

Hogei saio baino gehiago eskainiko ditu Elkarteak Tolosaldean.

Beraiei egokitutako bertso saioak entzun eta haietan parte hartzeko aukera izango dute eskualdeko umeek datozen asteetan, Harituz Bertsozale Taldearen eskutik. Irailean zehar ikastetxez-ikastetxe ibiliko dira elkarteko kideak eta haurrek bertso saio bat zer den ezagutzea eta haiek bertsozaletzea izango dira egitasmoaren helburuak.

Irailaren 14an egin du Harituzek lehenengo saioa Ibarrako Uzturpe Ikastolan eta bertako arduradunak “oso pozik” daude ikastetxean antolatutako ekintzarekin. Datozen egunetan, hogei saio baino gehiago egitea aurreikusi du taldeak, eskualdeko hainbat ikastetxetan. 2020-2021 ikasturte amaieran ere umeentzako saioak eskaini zituzten eskualdeko bertsolariek Tolosaldeko ikastetxeetan eta orduan ere balorapen ezin hobea egin zuten bai antolatzaileek, baita ikastetxeek ere.

Bertso saio horien bidez haurrak eskualdeko bertso-eskoletara erakartzea ere lortu nahi du Harituzek. Azken ikasturteetan, hamar bertso eskola talde inguru egon dira Tolosaldean eta aurten ere ikasle kopuruari eustea da taldearen asmoa. Interesa dutenek Harituz Bertsozale Taldearekin harremanetan jartzeko eskera egin dute antolatzaileek harituz.bzt@gmail.com helbide elektronikora idatziz.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!