Martxan da VIII. Pello Mari Otaño bertso-paper lehiaketa

Lanak aurkezteko epea urriaren 8ra arte egongo da zabalik.

Hernandorena Kultur Elkarteak eta Harituz Tolosaldeko Bertsozale Taldeak elkarlanean antolatu dute VIII. Pello Mari Otaño bertso-paper lehiaketa.

Aurten ere lau mailatan bereizita egongo da lehiaketa: Tolosaldeko gelen arteko mailan, gaztetxoenean, gazteen mailan eta helduenean. Maila guztietan, gaia, neurria eta doinua libreak izango dira baina ez bertso kopurua: gelen arteko mailan, bertso-paper bakoitzak hiru bertso edo sei kopla izan ditzake. Gaztetxoen mailan, hiru bertso edo sei kopla. Gazteen mailan, berriz, gutxienez sei bertso idatzi beharko dira eta helduenean, gutxienez zortzi. Parte-hartzaile bakoitzak aurrez argitaratu gabeko nahi adina bertso-paper bidali ahal izango ditu.

Bertso-paperak urriaren 8a baino lehen aurkeztu beharko dira e-posta bidez. Sorta irabazleak aukeratuko dituen epaimahaia Harituz Tolosaldeko Bertsozaleen Elkarguneko kideek osatuko dute eta sariren bat hutsik gera liteke epaimahaiko kideek horrela erabakiz gero. Lehiaketako irabazleak nor izan diren azaroaren 8an jakinaraziko du Hernandorena Kultur Elkarteak eta sari banaketa ekitaldia modu telematikoan egingo da.

Informazio gehiago nahi duenak, Harituz Bertsozale Taldearen Facebook orrialdean topa dezake edota honako lotura honetan.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!