Harituz Bertsozale Taldeak hamasei saio partizipatibo eskaini ditu udaberrian, eskualdeko ikastetxeetan. Ikasturte amaiera aitzakiatzat hartuta, “Gu ere bertsotan” proiektuan parte hartu duten ikastetxeetan eskaini dituzte saio horiek. Bertso saioetan bi bertsolari aritu dira kantuan eta ikasleak izan dira gai-jartzaile rola hartu dutenak. Berrehun haur baino gehiagok gozatu ahal izan dute saio horiez.
Ikasturte guztian zehar bertsolaritza lantzen aritu dira eskualdeko ikastetxe ia guztietako ikasleak eta azken saioan, beraiei eskainitako saio bat ikusi eta entzun ahal izan dute Harituz Bertsozale Taldearen eskutik. Saio horietan, gaiak jartzeaz gain, kanturako tartea ere izan dute gaztetxoek eta antolatzaileek azpimarratu dutenez, bai gaiak jartzerakoan, bai bat-batean aritzerakoan, agerian utzi omen dute urtean zehar ikasitakoa.
Harituz ekainean ari da 2021-2022 ikasturteko bertso-eskola taldeak antolatzen eta zabalik dago dagoeneko aurrematrikulazio kanpaina. Bertso eskolan parte hartu nahi dutenek euren ikastetxeetan eskatu beharko dute izen-emate orria edota mezu bat idatzi harituz.bzt@gmail.com helbidera, euren interesa azalduz. 2020-2021 ikasturtean, hamaika bertso-eskola talde egon dira eskualdean eta datorren ikasturtean gehiago izatea espero dute.