Harituz Bertsozale Taldeak bertso jarrien kantaldia antolatu du beste urte batez. Larraulen izango da aurtengo ekitaldia, maiatzaren 15ean, 18:00etan hasita. Eguraldi ona egingo balu, parke zaharreko belardian izango da kantaldia. Txarra egingo balu, berriz, elizan. Eskualdeko bertsolari eta bertsozaleek bertso sorta berriak nahiz historikoak abestuko dituzte Aitor Atxega gitarristak lagunduta.
Bertso jarrien kantaldia Harituz Bertsozale Taldearen ekimen nagusi eta zaharrenetakoa da. 2012tik, urtero egin izan da, afari formatuan ia beti. Aurten, ordea, osasun egoeraren larritasuna medio, ekitaldia kantaldi formatuan egitea erabaki du elkarteak eta antolatzaileek aitortu dutenez, formatu hobea izan daiteke bertso sortak abestu nahiz entzuteko. Kantaldira joateko ez da sarrera nahiz gonbidapenik hartu beharko.
Aurtengo ekitaldia berezia izango da beste hainbat arrazoirengatik ere. Hainbat larrauldarrek euren sortak prestatu eta abestuko dituzte herritarren aurrean, tartean, eskolako haurrek eta oholtza gainean inoiz gutxitan ikusi ohi den jendea ere ikusi eta entzun ahal izango da ekitaldian. Hori dela eta, Harituzek eskualdeko bertsozaleak kantaldiaz gozatzera gonbidatu nahi ditu.