Harituz Tolosaldeko Bertsozale Elkarguneak gazte eta helduentzako bertsolaritza tailerrak eskainiko ditu maiatzean. Tailerrak non eta noiz eskainiko diren ere zehaztu du elkarteak: bata, Iruran izango da, astelehenetan, 19:00etatik 20:30era. Lizartzan izango da bestea, asteazkenetan, 18:30etik 20:00etara. Ordu eta erdiko lau saioz osatuta daude tailerrak eta bertsolaritza ezagutu eta bertsotan arituz gozatzea da helburu nagusia.
Martxoan zabaldu zen tailerretan izena emateko epea eta behin izen emateak bildu ondoren, parte-hartzaileak bi taldetan antolatu ditu Harituzek. Orain, ordea, izen-emate epea berriro zabaldu du elkarteak apirilaren 30era arte, beste inork izena eman nahi badu, horretarako aukera izan dezan. Izena emateko nahikoa izango da mezu bat bidaltzea harituz.bzt@gmail.com helbide elektronikora.
Tailerren hasiera egunak maiatzaren 3a, Iruran, eta 5a, Lizartzan, izango dira. Harituzek eskualdeko bertsozaleak parte hartzera gonbidatu nahi ditu.