Pello Mari Otaño bertso-paper lehiaketara lanak aurkezteko epea urriaren 11n itxiko da. Bertso-sortak posta elektronikoz entregatu behar dira info@hernandorena.eus helbide elektronikora. Bertso-sorta ezizenez sinatu beharko da eta harekin batera, izen-emate orria beteta. Zazpigarren urtez jarraian antolatu dute sariketa Hernandorena kultur elkarteak eta Harituz Tolosaldeko Bertsozale Taldeak.
Sariketa lau mailatan banatuta dago: gelen arteko mailan, gaztetxoenean, gazteenean eta helduenean. Maila guztietan, bertsoen gaia eta neurria librea da baina gutxieneko bertso eta kopla kopurua antolakuntzak zehaztuta daude. Jasotako lan horietatik onenak zein diren Harituz Bertsozale Taldeko kideek epaituko dute eta azaroaren 9an argitaratuko dira maila bakoitzeko sarituen izen-abizenak.
Sari-banaketa ekitaldia abenduaren 4an egingo da, Zizurkilgo Herrigunean, osasun egoerak ahalbidetzen duen moduan. Irabazleek sari bikainak jasoko dituzte, bertan: 500 € helduen mailan, 250 € gazteenean eta 100 € gaztetxoenean. Maila bakoitzeko bigarren sailkatuek ere sariak jasoko dituzte. Antolatzaileek sariketan parte hartzeko gonbidapena luzatu nahi izan du.
