Urriaren lehen astean hasi eta 2020ko ekainera arte martxan izango dira eskualdeko bertso-eskolak. Aurten ere, azken urteetako joerari eutsiz, 50 haur inguruk eman dute izena Tolosaldeko bertso-eskoletan eta Harituzeko kideak "pozik" daude jendearen erantzunarekin. Hala ere, jakinarazi dute oraindik izen-emate epea zabalik dagoela eta eskualdeko haur eta gazteak izena ematera gonbidatu nahi dituzte. Interesa duen orok bidal dezala mezu bat harituz.bzt@gmail.com helbide elektronikora eta beraiek helaraziko diete informazio guztia.
Aurten ere eskualde guztiko haurrei eskaini die Harituzek bertso-eskola zerbitzua eta horretarako, eskualdeko 8 herritan banatu ditu bertso-eskolak. "Gure helburua, bertso mundura hurbildu nahi duten haur zein gazte guztiek inguruan erreferentziazko bertso-eskola bat izatea da, han euren sormena eta kanturako grina gara ditzaten, tarte bikaina pasatzearekin batera".
Harituzek aurten ere aisialdiko jarduerak antolatzen jarraituko omen du gainera, "eskualdeko bertso-eskoletan dauden gaztetxoen arteko saretzea eragiteko" eta ikasturtean zehar helduentzako bertso tailerren bat ere antola omen dezakete, adi beraz.
Izen-emate epea zabalik dago oraindik eta Harituzek eskualdeko haur eta gazteak bertso-eskoletan izen-ematera gonbidatu nahi ditu.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!