Hasi da ikasturte berria eta Harituz Tolosaldeko Bertsozale Taldea bertso eskoletako taldeak osatzen ari da. Aurten ere Harituzen helburua bertso eskoletan parte hartu nahi duten ikasleen eskariari ahalik eta ondoen erantzutea da eta ahal den heinean, lehengo taldeak mantendu eta haiek indartzea.
Horregatik, eskualdeko gaztetxoak bertso-eskoletara erakartzeko bi saio parte-hartzaile antolatu ditu Harituzek. Bata Zizurkilgo Plazida Otaño liburutegian izango da, irailaren 25ean, arratsaldeko 18:00etan hasita. Bestea, berriz, irailaren 26an izango da, ostegunez, Lizartzako udal aretoan, hau ere 18:00etan hasita.Harituzek eskualdeko 10-14 urte bitarteko gaztetxoei luzatu die deia bereziki, baina saio parte-hartzaile hauek irekiak izango direla jakinarazi du.
Bertso saio parte hartzaileek gaztetxoen parte hartzea izaten dute ardatz, eta haien intereseko gaien eta arazoen inguruan kantuan aritzen dira bertsolariak. Saioek ordubete inguru irauten dute eta antolatzaileen ustez "oso erakargarriak eta dibertigarriak" izaten dira, "hasi ordurako bukatzen diren horietakoak".
Saioak irailaren 25ean Zizurkilen eta 26an Lizartzan izango dira eta 10-14 urte bitarteko gaztetxoei parte hartzeko deia luzatu nahi die Bertsozale Taldeak.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!