Harituz Tolosaldeko Bertsozale Taldeak azken urteetan urtero antolatu izan du bertso jarrien afaria. Normalean abenduaren hasieran izaten da, baina 2017a txapelketa urtea izanda data aldaketarekin dator aurtengoa.
Pello Errota bertsolariaren heriotzaren mendeurrena da 2019an eta Asteasuko udalak bi urtez hainbat ekintza programatu ditu Harituzen laguntzaz. Ekintza sorta horri hasiera emango dio bertso jarrien afariak.
Asteasuko Iturri-Ondo jatetxean izango da aurtengoa. Afalondoan herriko zein eskualdeko bertsolarien bertso jarriak abesteko aukera izango da Tomax Lizardi gitarjolearen eta Asteasuko zenbait musikariren laguntzaz.
Afaritarako txartelak Iturri-Ondon bertan eta Zizurkilgo Iriarte jatetxean eskuratu daitezke. Horrez gain, leku horietara bertaratu ezin direnek txartela gorde dezakete 695751450 zenbakira WhatsApp mezu bat bidalita. Bertso egileek ere aukera dute parte hartzeko, horretarako Harituzekin harremanetan jar daitezke harituz.bzt@gmail.com helbidera idatzita.