Bere oroitzapenetik datorkidan guztia ona da: poza, bizitasuna, eskuzabaltasuna, adiskidetasuna... eta artea. Tolosa bete zuen bere obrekin, bai tabernak, bai dendak, baita Aranburu Jauregia bezalako beste leku batzuk ere.
Kultur etxeko pintura tailerreko ikaslea izan zen, non bera erlaxatzen zen eta ingurukoak ere erlaxatu egiten ziren, irakasleak barne. Hauen artean gure lagun Jose Luis Longaron handia, gauza askoren konplize egin gintuena, borrokalari izaera partekatuz beti. Jite horrek azkeneraino borrokatzera eraman du.
Edertasun handia utzi duzu gure oroitzapenetan, Isabel. Leirek eta biok topa egingo dugu Möet Chandonekin, zu zauden tokian margotzen eta alaitasuna banatzen jarrai dezazun. Prestatu zure kopa.
Jokin Ansorena Miner, Tolosa