Sebas Goikoetxea Mariezkurrenak eta Josetxo Jauregi Altubek oroitarri bat dute Ibarran, Emeterio Arrese kaleko Arane iturriaren aldamenean. Hortik metro eskasetara sortu eta bizi izan zen Sebas, 1977ko martxoaren 8an Nikolas Mendizabal zaldibiatarrakin batera Itxason hil zuten arte.
Ibarrako herriak ipinia da oroitarria, bere bi semeak gogoratzeko, poliziak tiroka hil zituela ez ahanzteko. Egun seinalatuetan loreak jartzen dira eskulturaren inguruan, baita bi biktimen argazkiak eta ikurrina ere.
Errespetu handia zaio txoko honi, jende ugari igarotzen da albotik oinez. Baina joan den asteartean, hilak 24, baten batek ikurrina urratu eta gure senideen argazkiak hondatu zituela jabetu ginen. Tamalez, ez da lehendabiziko aldia. Oroigarri xume bat besterik ez bada ere, halako erasoak jasan behar izaten ditu tarteka, lehen hilerrian sarri gertatu ziren bezala.
Erasoak eraso, ez ditugu gure etxekoak ahaztuko. Eta beste behin ere, gauza bat eta bera eskatu beharrean gaude: utz ditzatela bakean behingoz.
Aintzane Bergara Aldaz, Sebasen senide guztien izenean