Bitartean, eskuineko alderdiak Israelen alde jarri dira. Ezkerreko alderdi politikoek, aldiz, elkarrizketarako deia zabaltzen dute. Baina, zein elkarrizketa da posible ordea, bere oinarritzat genozidioa duen estatu batekin? Israelen existentzia bera, krimen zuzen bat da palestinar herriarentzat eta Palestinarrek eskubide osoa dute erresistentziarako eta zilegi ez den estatu israeldarrari aurre egiteko. Modu horretan, ezkerreko alderdiek zuzenean edo zeharka Israel eta mendebaldearen proiektu sionista zilegiztatzen dihardute. Joan den larunbateko irakurketa irakurri besterik ez dago, ikusteko nola plazaratzen duten diskurtsoa OTAN eta Europar Batasunarekin bateragarria den, elkartasun mezu antzuekin nahastuta. Bertan, hiru ideia nagusi daude: bi aldeetako erasoak modu berdinean salatzea, bi bandoen arteko gerra hutsa balitz bezala; bake prozesu bati deia, bi aldeen arteko elkarrizketa eskatuz; eta Nazioarteko Zuzenbidearen mandatuak errespetatzea. Gatazkaren oinarriak zerbait ezagutzen dituenak, badaki irakurketa honek iraganarekiko egiten duen desitxuratzea eta ahaztea.
Beharrezkoa zaigu egoera honen aurrean mobilizatzea, baina ekidistantzian eta palestinar erresistentziaren kriminalizazioan erori gabe. Hitzordu garrantzitsu bat dugu, beraz, larunbat honetan Bilbon. Palestinar herriaren askatasuna Israelgo estatuaren deuseztatzearekin erdietsiko da, eta hau aldarrikatzeko aterako gara kalera larunbat honetan 18:00etan Bihotz Sakratutik. Gure eskualdetik autobus bat antolatu da eta Raku tabernan eman daiteke izena.