Gutuna

Alde Zaharrak ezin du partxe gehiagorekin

Erabiltzailearen aurpegia

Tolosako Udalak berriki aurkeztu zuen  Zumardi Txikiko aparkalekuak desagerrarazteagatik proposatutako soluzioa: lurpeko aparkalekuetan aparkatzea, tokia baldin badago, eta urtean 1.380 euro aurreratuz (%50eko diru laguntza jasotzeko aukerarekin). Bilera horrek, eta bertan emandako ikuspegiak, Tolosako erdigunearen errealitatea bistaratu eta bertako hainbat bizilagunen ezinegona piztu du.

Badakigu, etxetik gertu horrelako espazioa berreskuratuz, Alde Zaharreko bizilagunak  izango garela lehen onuradunak, eta zentzu horretan, ingurua berreskuratzearekin erabat ados gaude. Alde Zaharrak, ordea, konplexutasun asko ditu. Etxebizitza bakoitzeko errenta baxuena duen auzoa da (bataz bestekoa baino %33 baxuagoa) eta langabezia tasa eta etorkin portzentaje altuena (%20) duena. Argi dago, beraz, emandako alternatibak ez duela bat egiten Alde Zaharreko errealitate sozial eta ekonomikoarekin, eta zentzu honetan, ez dugu uste soluzio egokia eta errealista denik.

Zumarditxikitik kotxeak ateratzeak gainera, inguruan ditugun egun osoko aparkalekuen %30a kentzea suposatzen du eta udalak proposatutako soluzio ez badugu aprobetxatzen, 100 kotxe gehiago izango ditugu dagoeneko gainezka dagoen Tolosako kaleetan barrena. Eragina hortaz tolosar guztiok sumatuko dugu.

Sakontasunez eta perspektiba zabalarekin landutako proposamena egitea eskatzen du egoerak, eta Zumarditxikian dauden kotxeak non birkokatu pentsatzea ez da nahikoa. Urte luzez egon da Zumarditxikiren gaia lanketan, eta beti aipatu da aparkalekuei irtenbidea emandakoan egingo dela esku-hartzea. Irtenbideak ezin du partxe bat izan, are gutxiago, egoera zailean eta benetan zaurgarria den auzoan.

Alde Zaharrari dagokionez  premia ugari ditu, eta behar beharrezkoa du epe motz, ertain eta luzera begira egindako analisia eta bide-orria osatzea bizilagun, dendari eta erakunde ezberdinekin batera. Gune historikoan eragin zuzena izango duen esku-hartze baten aurrean, perspektiba luzeko erabakiak hartu behar dira, patxadaz.

Biztanleriaren zahartzeak, etorkin eta pobrezia tasa gero eta altuagoak, komertzio eta ostalarien gutxitzeak, gune ospel eta ez erabilien ugaritzea… taxuzko biziberritze-plana behar du Alde Zaharrak. Bertako hainbat bizilagun prest gaude beharrak eta kezkak partekatzeko, baina ezin gara soluzio partzial eta ez erreal batera mugatu, mira altxatzeko garaia da.

Miguel Legarra Muñoz eta Maite Asensio Iparragirre
Alde Zaharreko bizilagun taldea

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!