2021eko ekaina. Osasun-arretarako eskubidea erabiliz, dagokion medikuaren kontsultara joan nintzen, eta hark hainbat proba egin zizkidan diagnostikoa egin arte, eta urte bereko uztailean errehabilitaziora bideratu ninduen, telefono bidezko hitzorduaren zain geratu nintzelarik. Pazientziaz itxaron nion deiari, pandemiak eragindako atzerapena izango zelakoan, eta ondorioz, patologia larriagoak artatu beharko zituztelakoan.
Itxaronaldia 2022ko otsailera arte luzatu zen! Errehabilitazioa Belateko zentroan hasi nuen, harrituta geratu nintzen ikustean 15 kabina eta erabilera anitzeko gela bat dituztela eta hiru fisioterapeuta baino ez daudela. Fisioterapeutak gainezka daude eta pazienteengatik % 200 ematen. Mila esker langileei!
Lesioa gertatu zenetik igarotako denbora zela eta, nire sintomak larriagotu egin ziren, eta, beraz, beste mediku batek artatu behar izan ninduen, eta beste proba batzuk eskatu zizkidan. Horretarako, hitzordua eman zidaten 45 egun geroago. Ezin sinetsirik, erakusmahai berean klinikaren zuzendaritzaren kokapena adieraztea eskatu nuen eta modu oso atseginean eman zidaten. Zuzendaritzan Bezeroarentzako Arreta dioen kartel batekin topo egin nuen, ez Pazientearen Arreta! Nire haserrea areagotu zen Zuzendaritza/Kudeaketara sartzean langile batek geldiarazi zidanean sail horretan inor ez zegoela esanaz. Jakinarazi nion erreklamazio bat jartzeko asmoa nuela frogak gehiegi atzeratu zirelako, eta sorpresa, bi egunetara deitu zidaten astebetera hitzordua emateko. Beste mediku batetik pasa eta errehabilitaziora bideratu ninduten. Oraingoan azkarragoak izan ziren, zuzenean zuzendaritzara jo bainuen.
Kontsulten arteko joan-etorri horretan, mediku gehienek ez zutela identifikazio-txartelik ikusi nuen, eta, beraz, nire kontsulta ugarietako batean artatzen ninduenari galdetu nion zein zen bere izena eta oso modu txarrean erantzun zidan: «Zure egoeraren berri ematera etorri zara kontsulta honetara». Imajinatzen dut lan egiteko espezialitate homologaturik ez dutenez, asko zainduko dutela beren nortasuna eta egoera ez nabarmentzea, zuzendaritzaren jarraibideei jarraituz eta administrazio publikoaren isiltasunaren pean, hau da Tolosako udal-gobernua edo Eusko Jaurlaritza, esku berberen esku daudenak.
Osasun publiko duina izateko eskubidea kendu digute! Banaka borrokatuz gauzak lortzen badira, batuta erronka handiak gainditu ditzakegu. Jarrai dezagun elkarrekin aldarrikatzen, temati, titulartasun publiko eta kudeaketa publikoko Ospitale Publikoa, osoa, Tolosak eta eskualdeak behar dituzten zerbitzu, langile tituludun eta ekipamendu guztiekin.
Tolosaldea ospitale publikoaren alde!
Mila Canseco Nieto, Tolosa