GUTUNA

Errespetua errespetuz irakasten da

Erabiltzailearen aurpegia Naiara Errexil 2022ko api. 9a, 16:52

Gaur bertan, apirilak 9, Amezketako eskolako futbol zelaian bizitakoaren inguruko kontakizun bat egin beharrean nago, ezin baitugu horrela segi. Amezketako eskolako haurrek Tolosako Laskorain Ikastolako haurren aurkako futbol partidua jokatu dute, Eskola Kirola ekimenaren barneko partidua. Lehen bi zatietan guztia ondo joan da. Haurrek ahalik eta ondoen jokatu dute, elkarrekiko errespetuz eta jarrera positiboarekin. Baina, hirugarren zatitik aurrera ikusitakoak ez dauka izenik, edo bai, badu: lotsagarria. 

Amezketako entrenatzaileak Laskoraingoari partidu hauetako arau bat betetzea eskatu dio, porteroa aldatzea, besterik ez; izan ere, badirudi, ezin dela partidu osoa portero berarekin jokatu. Ba, eskaera horren aurrean erabat aldatu da entrenatzailearen jarrera, eta noski, hartu duen jarreragatik partidua erabat desitxuratu da. Denetik ikusi ahal izan dut: min hartu duen haur bat lurrean zegoen bitartean parrezka sumatu dut, ezinarengatik negarrez ari zen aurkako taldeko haur bati “egin negar bai, egin negar!” hitz horiexek esan dizkio, jokatzen ari den beste haur bati “cállate, niño!” ere esan dio, eta gehiago ere izan dira, oso deserosoak guztiak, jarrera desatseginean eginak, errespetu gabekoak eta haurren kirolean sustatu nahi diren baloreen kontrakoak guztiz.

"Ezin da errespetuan hezi guk geuk errespetuz jokatzen ez badugu. Haurrek guk egiten dugun hori egingo dute eta ez guk egin behar dutela esaten diogun hori, ez ahaztu"

Ezin da errespetuan hezi guk geuk errespetuz jokatzen ez badugu. Haurrek guk egiten dugun hori egingo dute eta ez guk egin behar dutela esaten diogun hori, ez ahaztu. Zorionez edo zoritxarrez horrelaxe izan da orain artean eta horrelaxe izango da gerora ere. Uste dut haurrek oso eredu negatiboa jaso dutela. Heziketan dihardut, eta kontaezinak dira haurrak errespetuzko jokaeretan hezteko egiten ditudan ahaleginak, eskoletan egiten ditugun ahaleginak. Mesedez, larunbat goizeko partidu soil batek ez beza eskoletan egiten dugun ahalegin izugarri hori baztertuta utzi.  

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!