Gainera, ikasleen galderak erantzun dituzte eta guztiz aberatsak izan dira gure ikastolak Aita Mariko kapitainari zein boluntarioei egindako galderak zein haien erantzunak. «Zer da gertatu zaizuen kasurik zailena? Pertsona bat hil bada ontzian... Zer egiten duzue? Nola lagundu dezakegu herritarrok….?» 2017an, Mediterraneo erdialdeko egoera tragikoa ikusita, itsas erreskatearen proiektua martxan jartzea erabaki zuten, Aita Mariren Maydayterraneo proiektua da hain zuzen ere, egitasmoa.
Laskorain Ikastolak, proiektua eta protagonistak ekarri nahi izan ditu ikasleengana. Boluntarioen eta elkarteen lan eskergari eta erakundeen finantzaketari esker, Aita Mari erreskate ontziarekin erreskate misioak egiten dituzte Mediterraneo erdialdeko SAR eremuko uretan; gerratik, gosetetik edo zapalkuntzatik ihesi, etorkizuna izateko modu hori besterik aurkitzen ez duten pertsonen ontzi ezegonkorretan laguntzeko.
Laskorain Ikastolak Aita Marik egin duen eskaintza eskertu eta egiten duen lana txalotu nahi du, bai eta aitortza egin ere. Pedagogia da giltza! Errespetua, duintasuna eta solidaritatea. Horiexek gaurkoaren hitz gakoak. Mila esker Aita Mari!
Itxaropena Urkiola Negredo, Laskorain Ikastola (Tolosa)