Jon Plazaola umoregileak Tolosan estreinatuko du “Tu-Tum, Platz!” izeneko bakarrizketa. Leidor aretoan izango da emanaldia, maiatzaren 5ean, 20:00etan. Ikuskizun horri esker, Jon Plazaola bere sorlekura, bere sehaskara itzuli da. Taula gainean bere lehen agerraldia egin zuenetik 23 urte pasa diren honetan, berriz ere “Stand Up” formatuko bakarrizketari heldu dio; hori bai, 23 urte zaharrago, 23 urte jakintsuago eta 23 urte kabroiago. Sarrerek 10 euroko prezioa dute eta online Kutxabanken webgunean eta Leidorreko leihatilan eskuratu daitezke.
Lehenengo aldiz oholtzaratuko du Plazaolak “Tu-Tum, Platz!” ikuskizuna. Ordubete inguruko saio izango da, umorez betetako kolpez kolpe baten ondoren, umoregile urretxuarrak ardo onak bezala urteen poderioz hobera egin duen, ala ardo txarra bezala ozpindu den jakiteko. Umoregilea, gidoilaria zein antzezlea, euskarazko umorearen inguruko proiektu askotan parte hartu du Plazaolak: Finlandia, Wazemank, Kontuz atsuak!, Kontrako eztarria, Barre librea…
Emanaldia Tolosaldeko Atariarekin elkarlanean antolatu du Galtzaundi Euskara Taldeak.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!