Hitzordua maiatzeko azken asteazkenean izango da, hilak 30, 19:00etan Tolosako Kultur Etxean. Ohiko moduan, saioa Yurre Ugartek dinamizatuko du eta parte hartzeko ezinbestekoa izango da eleberria irakurrita izatea.
Ikasturtea amaitzeko, berriz, Eider Rodriguez gonbidatuko dute ekainaren 20an, Bihotz handiegia liburuaz hitz egiteko.
Jarraian, ‘Kristo irakiarra’ liburuaren inguruko informazio gehiago:
Noizbait esana du Hassan Blasimek irakiar bakoitzak beldurrezko bost istorio dituela gutxienez kontatzeko. Agian horregatik dago liburu hau kontalariz betea, modu konpultsiboan beren istorioak azaltzen dizkiotenak tabernako ezezagunari, psikiatrari, treneko ausazko bidaideari, irratiko mikrofonoari, datu bila dabilen ikertzaileari, adiskide eta senide presente edo absenteari.
Ezina dirudienaren gainetik zutuntzen diren ahotsak dira: gizakienak nahiz animalienak, denbora eta espazioaren mugak hautsiz mintzo direnak, bizidunen gorputzak literalki inbaditu eta haien baitatik berba egiten duten hildakoenak, mundu honetan hasitako solasaldia hil ostean jarraitzen duten lagunenak, zoramenaren ertzean bizi direnenak, bizialdi bakar batean bizitza bat baino gehiago bizitzea egokitu zaienenak…
Liburu hau osatzen duten hamahiru ipuinetan Kafka paseatzen da, bideokamera bat hartuta, gerrek eta indarkeriak inarrositako Mila gau eta bat gehiagoko lurraldetik.
Kristo irakiarrak Erresuma Batuko Independent Foreign Fiction Prize saria irabazi zuen 2014an, ingelesera itzulitako literatur lanik onenari ematen zaiona. Sari hau irabazi duen lehen obra arabiarra eta lehen ipuin bilduma izan zen.