12 eta 18 urte arteko (DBH eta Batxilergoa) gazteei zuzendutako tailerra da AST. Astean ordubeteko saioa izango da Tolosan; urrian hasiko da ikasturtea eta maiatzera arte iraungo du. Sormen eskolako edukiak bost generotan banatuko dira: antzerkigintza, bertsolaritza, kantagintza, dantza eta ipuin kontalaritza.
Bost espezialitateak landuko dituzte ikasle guztiek ikasturtean zehar eta klaseak astelehen edo astearte arratsaldeetan izango dira, hilabeteen arabera:
• Urria, otsaila, martxoa, apirila eta maiatzean: astelehenetan. 17:00etatik 18:15era.
• Azaroa, abendua eta urtarrilean: asteartetan. 17:00etatik 18:15era.
Jakintza arlo bakoitzak gaian espezializatutako irakasle propioa izango du:
-
Antzerkigintza: May Gorostiaga (Intujai Teatroko kidea).
-
Bertsolaritza: Mikel Artola (Harituz Tolosaldeko Bertsozaleen Elkarguneko kidea).
-
Kantagintza: Garazi Jauregi (Lorratzak musika taldeko abeslaria).
-
Dantza: Eneritz Ugartemendia (Oinkari dantza taldeko kidea).
-
Ipuin kontalaritza: Maider Galarza (Ipuin kontalaria).
ASTren prezioa 30 eurokoa da hilabetean (kurtsoa 240 euro) eta matrikula egiteko epea irekita dago irailaren 28a bitarte
www.galtzaundi.eus webgunean.
Tailerraren asmoa ikasle guztiek diziplina desberdinak probatzea da eta etorkizunean, horietakoren batean espezializatzeko aukera uztea. Jakina da, bost kultur espezialitate horiek bereziki lantzen dituzten taldeak badirela eskualdean. Izan ere, honelako tailer batek euskarazko kultur sorkuntzan eta zaletasunean berebiziko garrantzia izan dezake, etorkizuneko kultur agente aktiboak izango direlako oraingo ikasleak (zaleak, antolatzaileak, antzezleak, ipuin kontalariak, bertsolariak, kantautoreak...).
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!
