Ezin izan zuen Aratz Irazustabarrenak Zornotzako Master Kaiola txapelketako finala irabazi. 22-13ko emaitza geratu zen Amorebieta IV pilotalekuko markagailuan, eta honenbestez, Errioxara joan zen aurtengo txapela. Iban Petitek eraman zuen bertara.
Jubenil mailako finala zen Zornotzakoa eta lau t’erdian jokatu zuten buruz buru kategoria horretako onenek.
Finalak ez zuen historia gehiegirik izan. Nahiko azkar hartu zion alegiarrari aurre Petitek eta tarte horri eusten joan zitzaion partida osoan. Irazustabarrenak borrokatu zuen baina ezinezkoa egin zitzaion errioxarraren joari, batez ere bere boleari, aurre egitea.
Hala ere, zulo handiena errestoan izan zuen Intxurreko pilotariak. Tanto asko egin zizkion lehen jokaldiarekin. Sakearen meritua edo errestoan ez asmatzea.
Bestelako jokaldietan ere, batez ere arriskatu zuenean, ez zitzaizkion alegiarrari gauzak nahi bezala atera eta era horretan bueltatu zen finaletik herriko festetara. Finala jokatu izanaren pozarekin, baina bertan gehixeago eman ahal ez izanaren penarekin. Jokoaren gazi gozoak.