Otsaileko lehen asteburuan Parisen izan da Europako Zero Zabor bilkura. Muturreko bi adibideak ikasgai izan dira han ere: Parisko aglomerazioan, Ivry-sur-Seinen dute Europako zabor metarik handiena: urtean 700.000 tona errausteko gai den labea, eskualdeko meategi guztiak zabortegi bilakatuak, hondakin erradioaktiboak, eta eraikuntzako hondakin mendiak, industriako hondakin toxikoak…
Italiako Treviso eskualdeko Contarina mankomunitatea da beste muturreko erreferentzia: 50 udalerri eta 550.000 herritar biltzen dituen herri elkargo hori izendatu du Rifiutti Zero mugimenduak Italian lanik txukunena egiteagatik nabarmendu beharreko instituzio. Hondakinen kudeaketa antolatu dute azken errefusa «0» izatetik hurbilenera eramateko (2022rako biztanleko 14 kilo errefusa urtean sortzea dute helburu. Tolosaldeko biztanle bakoitzak 242 kilo sortzen ditu urtero): industriako kalitate prozesuen ikuspegia lotzen dute etika sozialarekin, errefusa dakusate industri produkzioaren akats moduan eta herritarrei bezala agintariei eta ekoizleei lehentasuntzat ezartzen diete «erantzukizuna».
Norantz jo nahi dugu? Gure eskuak erabakitzen du uneoro zabor bakoitzaren norabidea.