Tokiotarrei dagokienez, … zer nahi duzue esatea, … Erantzun baino galdera gehiagorekin gatoz bueltan. Beste 15 urte beharko genituzke zenbait portaera ulertzen hasteko, (bai beraiek ere gureak!) baina gertutik ezagutu ditugunen eskuzabaltasun, umore eta umiltasunarekin gelditzen gara.
Zortekoak izan garela aitortu beharrean gaude. Shogo Komiyamak dena primeran antolatuta izan du lehen unetik. Japonian denbora eta espazioa ez dira fisika kontuak: denbora eta espazioa dirua dira hemen. Kaskezurrean sartuta dute, eta puntualtasuna ere hortik datorkie. Denbora ondo aprobetxatu dugun sentipenarekin hartuko dugu bueltako hegazkina. Ez dugu alferrikako pauso handiegirik eman.
Argazkietan agertu ezin den oroitzapen mordoa daramagu geurekin etxera. Bihar aireportuan maletak fakturatzerako garaian pisuan sartuko gara noski, baina bizipenetan motxila ondo kargaturik goaz. Arigato guztioi.
Ah! Eta arigato Tolosaldeko Ataria-ri ere txoko honetan gure ibilien berri emateko aukera emateagatik.