Eusko Jaurlaritzak gaur bereganatu du Elgoibarko eta Tolosako (Gipuzkoa) anbulantzia medikalizatuen zerbitzuen kudeaketa. Kontratatutako zerbitzua izan da orain arte, Gipuzkoako Anbulantziak enpresaren esku egon da azken urteetan, baina gaurtik aurrera Osakidetzak kudeatuko du zuzenean.
Nolanahi ere, zerbitzua ematen duten langileen egoeraren inguruan badaude argitu gabeko xehetasun batzuk. ELA sindikatuak salatu duenez, Osasun Sailak langileak subrogatuko dituela esan duen arren, proposamenean zehaztu gabe dago langileen kontratuak mugagabeak edo aldi baterakoak izango diren.
Sindikatu horrek salatu du prozesu horretan Osasun Sailak gardentasunik gabe aritu izana. ZIU unitate mugikor horien zerbitzua jadanik Osakidetzaren esku badago ere, sindikatuek ohartarazi dutenez, langileekin ez dute negoziatu. Guztira, 36 langileri eragiten die publifikazioak: medikuak, erizainak eta osasun garraioko teknikariak dira orain arte Gipuzkoako Anbulantziak enpresa pribatuan zerbitzu hori eman dutenak.
Araban, Bizkaian eta Gipuzkoa publikoa da anbulantzia medikalizatuen zerbitzu ia osoa. Tolosako, Elgoibarko eta Donostiako zerbitzuak ziren salbuespena. Osakidetzak gaur bereganatu ditu Tolosako eta Elgoibarkoak, eta, Osasun Sailak iragarri duenez, Donostiako kudeaketa ere udan bereganatzeko asmoa du.
Osasun Sailak esan zuenez, profesionalek Osakidetzako langileen lan baldintza berak izango dituzte, lanpostuak LEP baten bidez betetzen diren arte. Horrek zalantzak sortzen dizkiete langileei, batzuk kalean geratzeko arriskua ikusten baitute. «Ziurgabetasun» hori ikusita, «egoera berehala konpontzeko» eskatzeko elkarretaratzeak egin dituzte bart 23:00 eta 00:30 bitartean, Tolosa eta Elgoibarko baseetan.