Amasa-Villabonako Xuhar Pazos gaztea larri zauritu zuten ertzainek jaurtitako foam batek begian jo ostean. Aurtengo inauterietan izan zen gertaera, otsailaren 13an, Tolosan. Begi batean larri zauritu zuten, eta ikusmena ez du oraindik osorik berreskuratu. Oinazez, medikutan segitzen du. Epaileak auzia artxibatzea erabaki du, eta defentsak helegitea jarriko duela jakinarazi du.
Ertzaintzaren arabera, agente batek jaurtitako foam pilotak istiluetan parte hartzen ari zen beste gazte baten besoan —hark botila bat zeraman eskuan, Josu Erkoreka orduko Segurtasun sailburuaren esanetan— eman zuela 16 urteko gaztearen begian eman aurretik; hau da, errebotez jo zuela. Are gehiago, begian lesioa jasandako gaztearen gain jarri zuen bertan egotearen ardura. «Ez zegoen kasualitatez han», adierazi zuen sailburuak, eta gehitu «aurpegia estalita eta botilak jaurtitzen ari zirenen alboan» zegoela, «gertatzen ari zena grabatzen». Ertzaintzaren ikerketaren arabera, «50 metrotik baino gehiagotik» egin zuten tiro agenteek, «gorputzaren beheko aldera», eta beste pertsona baten besoan errebotatu ostean jo zuen 16 urteko gaztearen begia foam jaurtigaiak. Beraz, ondorioztatu dute agenteek protokoloa bete zutela.
Jarraitu irakurtzen Berria.eus webgunean.