Bi helburu aipatu zituen Washingtonek Afganistanen gerra pizteko: Al-Qaedaren eremu militarrak suntsituz estatu lurralde batean finkatzea eragoztea talibanei, eta demokrazia sustatzea herri hartan. 150.000 hildako eragin eta gero, bi helburuetako bakar bat ere lortu gabe itzuli beharko dute estatubatuarrek etxera; Korean eta Vietnamen egin behar izan zuten bezala.
Aitortu beharra dago inbasioaren ondorioz sortutako gobernuek, gorabehera askorekin, aukera eman dietela hirietako afganistandarrei hainbat eskubide eta askatasun erabiltzeko; aurretik talibanek oso gogor zigortzen zituztenak, eta hemendik aurrera ere bortizki debekatuko dituztenak.
Beste behin errepikatuko da liztor habiari emandako ostikoaren teoria, zeinaren arabera ez den zuzena herri bat inbaditzea eta are ez-zuzenagoa den behin sartu eta sekulakoak egin eta gero alde egitea. Hori egin du Washingtonek.