Mendizaleak ez, eskiatzaileak

Erabiltzailearen aurpegia
BERRIA.EUS / JAKES GOIKOETXEA

Eskiatzaileak eta snowboarderrak elkartu dira batez ere goizean Iturriotzen, Gazumera igotzeko eta irristan jaisteko asmoz. Ertzaintzak errepidea zaindu du, buxadurak ekiditeko.

Mendiko botak baino gehiago, eskiatzeko eta snowboard egiteko botak abiatu ziren atzo Iturrioztik gora (Aia, Gipuzkoa), izotzak hartutako mendi bidea kraskatzen. Ezohiko irudia mendizaleen ibilbideen ohiko abiapuntuan: jendea eskiak eta oholak bizkarrean edo eskuetan hartuta.

Helmuga ere ezohikoa zen atzo. Hernio (1.075 metro) izaten da Iturrioztik abiatzen diren mendizale gehienen helmuga. Gutxi izan ohi dira Herniora bidean, edo Herniora joan gabe ere, ondoko Gazumera (997 metro) joaten direnak. Atzo, ordea, Gazume ezezagunera zihoazen eskiatzaile eta snowboarder gehienak.

Andatzarrateko mendateko mendi magalak, normalean elur egunetan haurrez eta leraz beteak, hutsik. Magalak lurmentzen hasiak, eta elurra izotz bihurtuta. Aurreko egunetako elurretako panpinen baten arrastoak. Bertako aparkalekuan, deigarri, Belgikako matrikuladun furgoneta, surf oholak sabaian.

Andatzarrateko mendatean, 06:00ak pasatxotik Iturriotzera zihoazen autoen prozesioa ikusten, Josu Irastorza, Gipuzkoako Foru Aldundiko bidezaina. Elurra kentzeko ibilgailuko motorra piztuta, eguraldiari adi. Eguerditik aurrera okertuko zela zioen iragarpenak. «Villabonatik Orioko gainera arteko zatia dagokigu», azaldu zuen, kabinaren epeltasunetik, atea erdi irekita. 22:00ak arte lan egin zuten atzo. Kezka pixka bat bazuen, jendeagatik, «jendeak errazena egiten baitu, baina elurra egiten badu guk ibili egin behar izaten baitugu».

Ertzainak gora eta behera

Irastorzaren elurra kentzeko ibilgailutik metro batzuetara, Ertzaintzaren bi noranahiko, tarteka Andatzarratetik Iturriotzera arteko bidea egiten, autoek errepidea ez mozteko. «Prebentzio lana egiten dugu batez ere, jende asko ez pilatzeko», argitu zuen ertzainetako batek. «Guztia antolatu behar dugu, elurra kentzeko makina ibili ahal izateko eta erreskaterik egin behar izanez gero, larrialdietako ibilgailuak iritsi ahal izateko».

Jarraitu irakurtzen berria.eus-en

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!