Eudel Arabako, Bizkaiko eta Gipuzkako udalen elkarteak asteazkenean jakinarazi zuen laguntza emango ziela udalei udalerri guztietan 300.000 maskara doan banatzeko eta birusaren aurkako babes ekipamenduen hornidura indartzeko. EITBk jakinarazi duenaren arabera, ordea, maskara horiek erretiratuko dituzte astelehenetik aurrera, akastunak direlako.
Eudelek gutun bat igorri die udalei, ohartaraziz kaxa batzuetan akatsak topatu dituztela. Besteak beste, oihalari eusten dioten gomak askatuta daude edo apurtu egiten dira. Horregatik, elkarteak kaxa guztiak jasoko ditu, eta, horretarako, maskara horiek eskuratu zituzten herritarrek udaletara eraman beharko dituzte bueltan. Hala ere, elkartearen esanetan, oraindik herritarren artean banatzen hasi gabeak ziren hainbat udaletan.
Akatsik gabekoak iristean, berriro banatuko ditu Eudelek. Bizkaian 145.000 banatu zituzten, 107.000 Gipuzkoan eta 43.750 Araban.