Alarma egoera apirilaren 26 arte luzatzea eskatuko dio Ministroen Kontseiluak Espainiako kongresuari. Pedro Sanchez Espainiako Presidenteak egin du iragarpena. Alarma egoera luzatzea gizarteak «birusari aurre egiteko behar duen denbora» dela adierazi du.
Sanchezek argi erran du apirilaren 26tik aitzinera ere konfinamenduak indarrean jarraituko duela, baina nabarmendu du egoera ona bada pixkanaka leuntzen joango dela. Sanchezek iragarri duenez ez dute industriaren geldialdia luzatuko eta beraz aste santuaren ondotik industria berriz ere bere ohiko jarduerara itzultzen ahalko da.
Gizartearen bakartzeak bere fruituak eman dituela nabarmendu du Sanchezek eta koronabirusaren krisia hasi zenetik lehen aurrerapausoak eman direla. Hala ere arreta ez galtzera deitu du: «Erlaxatzeak hasieraren aurreko egoera okertu dezake». Gizarte osoari eskerrak eman dizkio eta jendearen jarrera ona txalotu du.
Etorkizunari begira jarrita, gizartea egunerokora «pixkanaka» itzuliko dela iragarri du Sanchezek. Egoera hori prestatzeko aditu talde bat lanean ari dela nabarmendu du eta plan bat idazten ari direla.
Esker oneko mezuak izan ditu Sanchezek autonomo eta enpresarientzat. Orain artean koronabirusaren ondorioak leuntzeko politikak egiten ari direla erran du Sanchezek. Alta, azpimarratu du krisi hau bigarren fase batean sartzean ekonomia berriz bere onera itzultzeko politikak martxan paratuko dituztela. «Krisi honek ez du inor atzean utziko», adierazi du irmo Sanchezek.
Koronabirusak sortuko duen gizarte krisiari aurre egiteko alderdi politiko eta agente sozialen inplikazioa eskatu du Sanchezek. Monkloako itunei egin die erreferentzia eta horiek errepikatzeko lan eginen duela nabarmendu du. Prentsa aitzinera atera aitzinetik alderdi nagusietako buruak deitu ditu Sanchezek. Pablo Casado alderdi popularreko buruak Twitter bide bere babesa adierazi dio. Alta, kritika ere luzatu dio Sanchezi: «Leialtasunak eta batasunak eraginkortasuna eta gardentasuna eskatzen dute».
Begirada Europan
Europara luzatu du begirada Sanchezek. Koronabirusaren krisiak Europa guztia erasaten ari dela nabarmendu du eta denek batera egin behar diotela aurre. Europar estiloko Marshall plan bat beharrezkoa dela nabarmendu du Sanchezek: «Garaia da Europako instituzioek bertako herritarrak babesteko».