Pilota topaketa 10:00etatik 12:30era egingo da. 120 neska mutil arituko dira, Behar Zanako elkartekoak bertakoak asko eta Tolosa CF, Zizurkilgo Ziotza, Andoaingo Gazteleku eta Iparraldeko Hardoytarrak taldetatik etorritakoak. Horrekin batera, Zizurkilgo Pedro Mari Otaño, Asteasuko Pello Errota eta Villabonako Zubimusu ikastolako eta Fleming herri eskolako haurrek, Eskola Kirolan aritzen direnek, osatuko dute zerrenda. Eskuz ariko dira gehienak eta gutxi batzuk palaz, eta gainera, Joko Garbi erakustaldia ere izango da.
Goiz osoan zehar, Getariako Elkano kofradiakoen laguntzaz, berdel dastaketa izango da. Berdela parrilan erreko da, eta Villabonako Hika txakolinarekin batera, Adunako Aburuza eta Zabala, Asteasuko Sarasola eta Astigarragako Irigoien sagardotegietako sagardoa dastatu ahal izango da.