Izen eta abizenez ezagunak diren kasuez gain ere, beste hainbat errepresio kasu jasaten ditugu Euskal Herrian, sistema kapitalistaren bidegabekeriei aurre egiteagatik zigortuak direnak. Errepresio eta jardun polizial horren atzean daude Eusko Jaurlaritza eta Barne sailburua, eta horiek etengabe herri mugimendua kriminalizatu eta poliziaren gehiegikeriak zuritzen dihardute.
Gutako bakoitzak jasaten ditu sistema honek ezarritako injustiziak, eta ez gara gutxi zapalkuntza horren aurka antolatzen garenak. Borroka honen lehen lerroan daude inolako zapalkuntzarik gabeko Euskal Herriaren alde lan egiten duen herri mugimenduko eragile desberdinak, eta horiek errepresio gogorra eta kriminalizazioa jasaten dute etengabe.
«Mobilizazio eskubidea jopuntuan jartzen dute, eta gaur egungo sistema kapitalistaren injustiziak areagotzen ari diren honetan, gure tresna baliagarriena da mobilizazio»
Gainera, azken hilabeteetan Eusko Jaurlaritza eta Barne sailburuak gogortu egin dute eragile horien kontrako kanpaina, eta justifikaezina justifikatzeraino iritsi dira, Flotillakoekin gertatutakoa izanik horren adibide garbienetako bat. Ekintza onartezin horiek ezkutatzeko, beraien estrategia poliziaren aurkako kanpaina bat dagoela argumentatzea izan da, baina albisteak ikusten dituen edonork ikus dezake polizia eta Eusko Jaurlaritza direla herri mugimendua ezabatzeko mugimenduak egiten dabiltzanak.
Hala ere, argi izan behar dugu eragileen aurkako kanpaina hori eskubide sozial eta politikoen aurkako kanpaina bat dela. Izan ere, Eusko Jaurlaritza eta Barne sailburuaren ekintzek mobilizazio eskubidea jopuntuan jartzen dute, eta gaur egungo sistema kapitalistaren injustiziak areagotzen ari diren honetan, gure tresna baliagarriena da mobilizazioa. Inolako zapalkuntzarik gabeko Euskal Herria eraiki nahi dugunontzat ezinbestekoa da eskubide politiko eta zibilen garrantzia azpimarratu eta horiek defendatzea, horiek izan ezean ezinezkoa izango baitugu borrokan jarraitzea.