Fokua Kuban jarrita, inperialismo yankiak Kubaren aurka azken urteetan biziagotu duen blokeoak herrialdea egoera larrian jarri du. Itzalaldiak eta erregaiaren eskasia ohiko errealitate bilakatu dira bertan. Horren eraginez, eguneroko bizitzaren arlo guztiak kaltetzen ari zaizkie: garraioa, elikagaiak zein ura eskuratzeko aukera, osasungintza, hezkuntza eta abar. Hori gutxi ez eta interbentzio militar baterako mehatxupean bizi dira. Are gehiago, Pentagonoak balizko eraso armatu baterako direktibak aktibatu berri dituen honetan.
AEBen blokeoak, Kubaren aurka ezarritako politika isolazionista eta kriminalaren eraginez Sobietar Batasuna desegin arte nabarmen gutxitu zituen bloke sozialistaren babesak. Baina egun inoiz baino bakartuago aurkitzen da Karibeko irla. Gainera, zinez paradoxikoa den arren, Trumpen gobernuak Kuba terrorismoa babesten duten herrialdeen zerrendan sartu zuen. Baina nola liteke mundu osoan gerra, izua eta zapalkuntza zabaltzen ari den potentzia inperialistak halako akusazioak egitea?
Izan ere, Kuba elkartasunaren, askatasunaren eta duintasunaren erreferentea da. Esaterako, Hego Ameriketako eta Afrikako hamaika txoko mediku-brigadaz edo gerrillariz hornitu zituen elkartasun internazionalista praktikan jarriz. Horrela Hegoafrikako apartheidarekin amaitzeko ezinbesteko laguntza emanez.
«Orain, berriz, guri dagokigu Kuba jasaten ari den blokeo inperialista salatzeaz gain, haiekiko elkartasuna praktikan jartzea»
Orain, berriz, guri dagokigu Kuba jasaten ari den blokeo inperialista salatzeaz gain, haiekiko elkartasuna praktikan jartzea. Bide horretan, aukera ezin hobea dugu IASek, EHKSek eta Euskadi-Kuba elkarteak elkarlanean antolatu dituzten elkartasun bilketetan ekarpena egiteko. Hilaren 25ean oinarrizko produktuak jasoko dituzte Euskal Herri guztian zehar, eta tartean eskualdeko 7 herritan. Beraz, zeuk ere ekarpena egin dezakezu laguntza bidaliz. Baina horretara mugatu ordez, ezinbestekoa da inperialismoaren aurpegi guztiak salatzen jarraitzea mundu guztian. Horretarako, beharrezkoa da langileon interesen alde eta unibertsalismoaren arabera jardungo duten agente politikoak eraikitzeko aurrerapausoak ematea.