Hezkuntza ere erreakzioaren mehatxupean

Hezkuntza publikoan nabarmena da inbertsio falta, eta horrek, noski, ikasleen egunerokotasunean kalte nabarmenak eragiten ditu, ratio, azpiegitura eta zerbitzuen murrizketak adibidez. Bestetik, hezkuntzan, gizarteko gainontzeko espazio guztietan bezala, geroz eta handiagoa da jarrera erreakzionarioen, matxisten eta arrazisten presentzia. Izan ere, horrelako ideiak zabaltzen dituzten alderdi politiko, kaleko talde eta sare sozialetako figura geroz eta gehiago daude. Kontuan hartu behar da belaunaldi gazteenek sare sozialetan ordu asko pasatzen dituztela eta bertako influencer asko jarraitzen dituztela. Horrek gizarte osoan eragiteaz gain, ikastetxeetako egunerokotasunean ere eragin du; izan ere, ikastetxeetan indarkeria matxista kasuek gora egin dute, horren adibide izanik Gasteizko Unibertsitateko letren fakultateko irakasle erasotzaile bat (EHU) zein Irungo irakasle erasotzailea. Jarrera matxistez gain, ideologia faxista eta klasista duten irakasleen aurka jarduteko ikasturtea ere izan da aurtengoa, Gasteizko farmaziako irakaslea edota Leioako zuzenbideko kasua.

Hainbat eta hainbat izan dira egoera larri honen aurrean antolatu diren ikasleak. Ikastetxe eta zuzendaritza askoren erantzuna, aldiz, egoera tamalgarri honi irtenbidea emateko antolatu diren ikasleak zigortzea izan da. Gainera, polizia-indarra ikastetxeetan sartzen ere utzi dute kasu batzuetan, Iruñeko Biurdana eta Iturrama institutuetan, eta baita Bilboko Unamuno ikastetxean ere, zuzendaritzaren jarrera guztiz pasiboa izan delarik.

Hala ere, aipatutako jazarpen kasu horiek ez dira greba testuingurura mugatzen, ikasleen eguneroko ogi baitira plataforma digitalen bitartezko kontrola, edota ikasleen diziplinamendurako zigor eta debekuak. Horrek guztiak ikasleak ikuspegi kritikoz aritzeko eta antolatzeko zailtasunak besterik ez ditu jartzen, gauzak hobetzeko edozein grina itzaliz.