Hemen goitik galdetzen dizuet:
Zer galdu du denborak?
Mina ala justizia?
Nahi dudana salbu,
denei dena ikusarazi nahi nizueke.
Hemen goitik gorantz datoz errautsak,
egunak lasai eta luze baitoaz
isiltasuna laztan bila datorkit
amaitu gabeko esaldiak ihesi joan aurretik.
Emeki belarrira esan nahi dizut
haizeari oihukatzen diodala
hiria lozorrotik esna dezan.
Hemen goitik ez da inon zure ahotsik.
Entzun!, ez naiz eta marmarka hasiko.
Hemen goitik jaurtiko dizuet euria,
paperezko euria.
Lokartu dut ilargia
nekatu naiz altxorra balitz bezala gordetzeaz,
gaurtik aurrera hemen goitik
zaborra balitz bezala gauero aterako dizuet.
Hiriari begira ari natzaiola
hemen goitik argitu du egunak.