Ez gehiago,
ez gutxiago.
Belarrira esan nahi nioke irailari
noiz iritsi zain egon naizela,
mutu eta denek jakiteko moduan
itxaron diodala,
beste behin,
irailari.
Jakin dezala, beste behin
ez diodala ongietorri suharrik emango,
besoak zabalik hartuagatik.
Badakar eta badarama irailak.
Badakar barealdiaren besarkada, amaren oporraldia.
Badaramatza udako komedia inozoak,
eta badakar Zinemáldiko erdipurdikeria dotorea.
Badarama gau hartako maitasun istorio iheskorra.
Iraultza isila da iraila,
urtaroen arteko Gerra Hotza,
betikoa eta berritasunaren arteko dema.
Horixe da iraila,
ehun hitzetan,
izenburua aintzat hartu gabe.