Baieztapen dotore bezain egiazkoa iruditu zitzaidan eta, hala, ordutik aurrera, irakasle zein ikaskideei entzuten dizkiedan maitasun dosi txikiak koadernoan apuntatzen hasi nintzen. Bada, eskola eta familiaren arteko harremanari buruzko hausnarketak plazaratu nahi nituzke gaurkoan. Aurreratu bezala, guztiak ere, dosi txikitan:
• «Irakasleak, gurasoak... gara; ez epaileak; guraso eta irakasleen funtzioa ez da elkar epaitzea».
• «Gai al gara ikasleak, gurasoak, irakasleak... epaitu edo horiekiko suposiziorik egin gabe entzuteko?».
• «Ikasleekiko, gurasoekiko, irakasleekiko... suposizioren bat egiten dugun bakoitzean, huts egingo dugu».
• «Ikasle edota seme-alaben heziketan, ezinbestekoa da bakoitza dagokion lekuan egotea: irakaslea, irakasle lanean; eta gurasoa, berriz, guraso lanean».
• «Irakasleen lan printzipala: ikasleei ikasten laguntzea. Gurasoen lan printzipala: seme-alabak heztea. Ez da komeni irakasleek gurasoen lana epaitzea, ezta gurasoek irakasleena epaitzea ere».
• «Mugek ziurtasuna ematen dute».
• «Errepresioa eta mugak ez dira gauza bera».
• «Mugak jartzea ez da inor kontrolatzea».
• «Mugak hautsi nahi izatea ikaste-prozesuaren parte da».
• «Mugak errespetatuz nahiz hautsiz, bi modu horietara ikasten da bizitzan».
• «Gaur egun, mugei dagokienez, desadostasunak daude eskola eta familiaren artean, eta hori ez da batere osasuntsua ikasle zein seme-alabentzat; eskolak eta familiak batera joan behar dute».
• «Familiak ezinbesteko dira eskolarentzat. Familiarik ez balego, ez legoke ikaslerik eta, beraz, ezta eskolarik ere».
• Irakasle batek gurasoei: «Gure lana zuen seme-alabei ikasten laguntzea da, ez zuen aurrean arrazoia izatea».
• «Irakasleok geure gurasoak zein ikasleenak bihotzean izan behar ditugu».
• «Irakasleok askotan konturatzen ez bagara ere, gurasoek dakiten hobekien egiten dute, eta alderantziz».
Barrura samar bai, baina ez dizuet gezurrik esango: bidean izango dira, baina ez dakit maitasun dosi txiki horiek gaur-gaurkoz bihotzeraino iritsi zaizkidan! Nahiago nuke hala balitz, baina, momentuz, intentzioa izatearekin konformatu beharko. Kontuak kontu, ez naiz gehiegi larrituko, hau ere, beste gauza asko bezala, «Gure bihotzaren Esku Dago eta!».