XX. mende erdialdeko Aralarko artzaintza giroa azalduko digu Inaziok: bere saroia, joan-etorriak, ardiak, mendiko bizimodua, gazta egiteko modua... Beti ere Euskal Herri zaharrago eta aberatsago baten arrastoak azalduz. Bigarren bideo honetan ere gai ugari ukituko dituzte. Hona hemen batzuk: ardi gaitzak, gaztaren lanketa, abereak eta artzain txakurrak, sasi ardiak; ardien bazka (belarra, gatza, pentsua, otea), tratanteak.
Oraingoan Inazio Artano artzain amezketarra dugu berriemale, Rexu Balerdi bedaioarraren laguntzaz. Inazio Artano Sagastume, “Elorrain” baserrian jaio zen duela 93 urte. Ia 80 urtez jardun du artzantzan Aralarko Etitzegi parajean eta egun, Tolosan bizi da. Rexu Balerdi Ondarza, Bedaioko “Elizetxea” baserrian jaio zen duela 80 urte. Mutikotan hasi zen ardiekin, nahiz eta gerora, lantegian jardun bizimodua ateratzen. Egun, Altzon bizi da.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!