Guztiek zazpina minutuko txanda izan dute harri bat edo bestea bizkarreratzeko. Zazpi minutuz txanda librean jardun dute Olaia Esnaolak, Garazi Ansak eta Udane Ostolazak. Ondoren, gizonezkoek heldu diote Ibiur Harriari. Baskulan 157,6 kilo eman ditu. Harri luzexka da, 80 bat zentimetrokoa. Duela sei urte, 7 partaide izan baziren, 5 lagunek bakarrik eman dute izena aurtengo ediziorako. Jokin Eizmendi izan da garaile, 13 jasoaldirekin. Aimar Galarragak 10 lortu ditu, duela 6 urte bezala. Hirugarren Mikel Lopetegi ‘Urra’ geratu da, harriari 9 jasoaldi emanda. Lan bikaina egin du Gorka Etxeberriak. Pisuan arinena izan arren, 7 aldiz altxatu du harria, duela 6 urte baino bi jasoaldi gehiago. Eta azkenik, Gari Garmendiak 5 jasoaldirekin konformatu behar izan du. Ez da bere eguna izan gaurkoa. Ikusmina sortu du txapelketak eta jende asko hurbildu da Baliarrainera, txalo eta oihuen bidez harri-jasotzaileak animatzera.
Bigarren edizioa izan du aurten jokatu den Ibiur Harri-Jasotze Txapelketak. Estrainekoa 2018ko abuztuan izan zen. Aurten, gainera, Errekalde harri baldarra erabili dute hiru emakumek, 83,4 kilokoa, erakustaldi gisa. Antolatzaileen esanetan, Txapelketa antolatzeko asmoa dute bi harriekin, 4 urtez behin.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!