Lehen egunean Abraham Cupeiro helduko zaigu Galiziatik. Abraham multiinstrumentista eta instrumentuen eraikitzailea da. Tolosara hirukote formatoan dator Sabela Caamaño eta Margarida Mariñorekin.
Apirilaren 21ean Lapurdiko Caroline Phillips eta Mixel Ducau izango ditugu gurekin.
Hurrengo egunean bi ekitaldi izango dira. Lehenik, Portugaleteko trikitilari eta musikaria den Xabier Aburruzaga eta bere bandaren txanda izango da. Trikitixa oinarritzat harturik, erritmo bizi eta koloretsuak eskainiko dizkigu instrumentalizazio aberatsaren bidez. Bigarren ekitaldian, berriz, Kubako HABANA 3 taldeak Caribeko doinu eta melodiak ekarriko dizkigu herri-kantekin nahastuz.
Larunbat goizez, Tolosaldea, Katalunia eta Asturiastik datozen musikariek alaituko dituzte Tolosako kaleak. Bi ekitaldi izango dira arratsaldez. Lehenik, Mongoliako herri-musika eskainiko digu Yesun Erdenek. Ondoren, KHAMI folk talde euskaldunak kontzertua emango du EH Plazan.
Azken eguna ere berezia eta ederra izango da. Iparraldeko Jean Mixel Bedaxagar, Mixel Etxekopar eta Xendarineko Ahizpak helduko dira Tolosara herri-doinu eta herri-kantak ematera gure belarrien gozagarri.