Ekitaldi ugari burutu dira bertan, bertso-saioa tartean. Alaia Martin, Miren Amuriza eta Julio Sotok ipini dute hitza eta doinua, eta izugarri disfrutatu du bertaratu den jendeak. Jentilbaratzaren erdian hasi dira kantari, Gorriti artista ingurumarian dela. Ikusleak gonbidatu dituzte mairubaratzan sartzera. Hori lortzearekin batera, bertsolariak kanpora irten dira eta hortik jardun dute bertsotan. Gero, zazpi pertsonaietako hirutan bertsolari bana kokatu da alboan eta horietatik jardun dute mitologia gaitzat hartuta. Amaitzeko, kolore ugariz margotutako oholen gainetik aritu dira kantari. Habe eta oholez osaturiko hesi zirkularraren barnera sarrarazi dute jendea. Oholtza berezi honetatik kantatu dituzte azken agurreko bertsoak.
Juan Gorriti Arriben bizi den artistak, GAZTARRI erakusketa ipini du mailopean. GAZTA eta HARRI hitzez osatutakoa da GAZTARRI, artzainak eta Aralar mendia elkar lotuz. Egurrezko ehundik gora piezaz osatutako bi Jentilbaratz, Mairubaratz edo Cromlech ezarri ditu belardi batean, Azkue deritzan parajean. Garai hartako mitologia oinarri hartuta, zazpi pertsonai ere jarri ditu erakusketan.
ATARIA ez da soilik komunikabide bat: komunitate baten ahotsa da, eta urte hauen guztien ondoren, zuen babesa behar dugu, inoiz baino gehiago: ATARIAk behar du Tolosaldea. Horregatik erronka bat daukagu esku artean: gure eskualdeko 28 herrietan hamarna harpidedun berri behar ditugu. Zu falta zara, bazatoz?
EGIN ATARIKIDE!