Lehen aldiz antolatu dute honelako txapelketa, Ibiur deitzen dioten errekarri baldarrarekin. Pisuan 157,8 kilo eman du harriak. Zazpi minutuko denbora-saioa izan dute harria bizkarreratzeko. Saio batetik bestera bi minutuko tartea ezarri dute.
Zozketa egin ostean, Iban Ugartemendiak ekin dio txapelketari eta zazpi jasoaldi egin ditu. Bigarren Guztak jardun du eta 5 jasoaldi eman dizkio harri baldarrari. Ondoren, Josu Urbietaren ordua heldu da eta harritzarra 4 aldiz altxatzea lortu du. Bere herrikide Imanol Illarramendik 8 altxaldi eman dizkio harriari. Xabier Peñagarikano gora datorren harri-jasotzaileak 10 aldiz jaso du Ibiur harria, baina epaileak baliogabetzat eman du altxaldi bat. Seigarren, Aimar Galarraga aritu da eta garaile atera da 10 jasoaldi eginez. Denetan gazteena eta pisurik gutxiena duen Gorka Etxeberriak ere lan bikaina egin du harria 5 aldiz bizkarreratuz.
Ikusmina sortu du txapelketak eta jende asko hurbildu da Baliarrainera. Antolatzaileak ere gustura geratu dira eta aurrerago berriro antolatzeko asmoa agertu dute.
Musika – Juan Mari Beltran ‘Martxa herrena’. Mila-mila esker, Juan Mari!