Unai Gibelaldek eta Oier Iturbek 40-31 irabazi zieten Xuban Lopetegi eta Gorka Huiziri, ostiralean Irurako Ametsa trinketean jokatu zen finalerdia.
Faborito ziren Unai eta Oier, eta ez zen ezustekorik izan. Hasera-haseratik markagailuan aurrea hartzea lortu zuten Unaik eta Oierrek (12-6/20-15), eta horrek lasaitasun apur bat eman zien , baina ez erabatekoa, aldeak ez zirelako erabakigarriak, eta pilotan lauzpabost tantu edo gehiago, sarritan ez direlako nahikoa izaten partidak erabakitzeko. Hori dela eta, tentsioa nabaria zen kantxan lau pilotarien artean.
Xuban ondo ari zen, bai erasoan bai defentsan, jokoan asko sartuz eta tantuak ondo amaituz, baina askotan behar baino gehiago arriskatuz, eta horren ondorioz, pilota erraz batzuk ere huts eginez; Gorka ere ondo ari zen, nire ustez txapelketako partida onena eginez, eta Unairen, eta, batez ere, Oierren erasoei ondo eutsi zien ia partida guztian. Bigarren erdian, partidak bere horretan jarraitu zuen; Unaik eta Oierrek ordura arte bezala, defentsan ondo, elkarrekin oso ondo ulertuz eta opari gutxi eginez, eta erasoan tantuak ondo amaituz jarraitu zuten. Horrela, haserako aldeei eusteaz gain, erabakigarria zirudien partidako alderik handiena(35-26) izatea ere lortu zuten, baina, une honetan, Xubanek eta Gorkak(0-5) partziala egin zuten, eta Unaik eta Oierrek hutsartea eskatu behar izan zuten, aurkariak gainera zetozkiela ikusita. Atsedena eta gero, Unaik eta Oierrek berriro aginte makila hartu zuten, eta partziala(5-0) itzulita, partida (40-31) irabaztea lortu zuten.
Ondorioz, Unai Gibelaldek eta Oier Iturbek Gipuzkoako Xare Txapelketaren finala jokatuko dute Matxalen Mendizabal eta Markel Mujikaren kontra, martxoaren 7an, larunbatean (16:00) Irurako Ametsa trinketean.