Ostiralean, ekainaren 14an, 18:30ean, jokatuko da Ametsa trinketean, Gaztetxoen mailako IV. Ametsa Pilota Xare Txapelketaren finala. Irati-Xuban bikoa eta Eneko-Mikel bikoa izango dira finala jokatuko duten pilotariak.
Faborito argirik gabeko finala izango da. Bi bikoek, txapelketa bikaina jokatu dute; Enekok eta Mikelek partida guztiak irabazi egin dituzte, eta horregatik zertxobait faboritoago dira, baina Iratik eta Xubanek ere euren maila ematen badute, irabazteko aukera izango dute. Hortaz, final estua eta lehiatua izatea espero da.
Larunbatean, ekainaren 15ean, 17:00etan, Gazteen mailako finala jokatuko da. Unai-Ibai bikoa eta Enaitz-Ander bikoa izango dira finalistak. Final honetan ere ez dago faborito argirik. Edozeinek irabaz dezake; lau pilotariak oso maila onean daude, eta denek euren maila ematen badute, final estu eta lehiatu bat ikusiko dugu.
Eta, amaitzeko, Jubenil mailako, buruz- buruko finala jokatuko dute Oierrek eta Markelek. Partida honetan Oier da faborito; jokatutako partida gehienetan, batean izan ezik, bere nagusitasuna erakutsi du, eta maila horretan aritzen bada, garaipena berea izango da. Hala ere, kontuz ibili beharko du Markelekin; oso pilotari arriskutsua da, eta egun ona badu, eta bere onena ematen badu, edonori irabazteko gai da. Beraz, ez dadila gehiegi lasaitu Oier.
Eta finala jokatuko duten denentzat balio duen beste zerbait gehitu nahi nuke. Alegia, finalak partida bereziak izaten direla, eta beste eragile batzuk ere ( presioa, urduritasuna...) sartzen direla jokoan egun horretan eta horiek ondoen kudeatzen dituztenek abantaila txiki bat izango dutela finaletan.
Onenek irabaz dezatela!