Tentsioa eta urduritasuna nabari zen lau finalisten artean partida hasi aurretik, baina hori ez zen nabaritu partidaren hastapenean; lau pilotariek, joku ona eginez, hasera bikaina eman zioten finalari. Partidaren erdira arte estu joan zen markagailua, gorabehera gutxirekin, baina hortik aurrera, Naroa Mujika eta Oier Garmendia, pixkanaka, markagailuan aldea irekitzen hasi ziren, eta alde horri ondo baino hobeto eutsi zioten amaierara arte.
Unai Gibelaldek eta Ander Mujikak ahaleginak egin zituzten alde hori murrizteko, baina horretan geratu ziren, ahaleginean. Gainera, azken tantoetako batean Unaik kolpe handi samarra hartu zuen eskumuturrean, eta ez zuen ehuneko ehunean amaitu partida. Hala ere, esan behar da Naroak eta Oierrek, partidako onena izan zenak, merezimendu osoz irabazi zituztela infantil mailako xareko Gipuzkoako Txapelketaren txapelak eta garaikurrak. Hauek, Leti Aristi, Udal ordezkaria eta Julen Zabalegi Ametsako ordezkarien eskuetik jaso zituzten. Txapeldunordeek, berriz, Oier Iturbe eta Mikel Uzkudun Ametsako ordezkarien eskuetik jaso zituzten euren garaikurrak.