Munduko bi xarelari erreferente izan diren Iñax Iturbe eta Joxi Lopetegi nor baino nor ikusteko aukera izango dugu ostiralean, Irurako Ametsa trinketean. Munduko txapeldunak, biak ala biak, bai 22 urtez azpiko mailan bai nagusien mailan. Horrez gain, xareko nazioarteko txapelketa, torneo, masters eta ireki garrantzitsuenak irabazitakoak biak.
Joxi Lopetegi oraindik goi mailan jokatzen ari da. Iñax Iturbek bereziki prestatu du txapelketa hau, bere semearekin jokatzeko aukera berezi honek izugarrizko ilusioa eta bere ametsetako bat betetzea suposatzen ziolako. Ikuskizuna bermatuta dago ostiralean, 19:30ean, Ametsa trinketean, eta, gainera, herritarron errekonozimendua ere merezi dute, bai Iñaxek bai Joxik. Eman diezaiegun, bada!
Oier Maiza, gaztearekin jokatuko du Joxi Lopetegik, eta Oier semearekin, Iñaxek. Bi gazte hauek ere indarrean datoz, eta xareko bi erreferente hauekin jokatzeak, ilusioaz gain, ikasgai ederra jasotzeko aukera ere emango die. Oier eta Joxi dira faborito txapelak janzteko, ligaxkako partida guztiak, Iñax eta Oierren kontrakoa izan ezik (40-35), erraz samar irabazi dituztelako, baina finaletara ailegatu eta jokatu egin behar izaten direla esan ohi da pilota munduan, eta Iñax eta Oier jokatzera aterako dira, hori seguru. Xareko partida eder baten atarian gaudela ez dago zalantzarik. Hortaz, badakizue, ostiralean, 19:30ean, Ametsa trinketean dugu hitzordua iruratarrok.