Maiza-Lopetegi bikoak 40-18 irabazi zien Yarza-Heras bikoari, Iparraldeko Ligako Gaztetxoak mailako finala, Arrangoitzen.
Ibai Larrañagak jokatu behar zuen Herasekin finala, baina ez zuen jokatzerik izan, Covid-19 birusa harrapatu zuelako. Bere ordez, Oier Yarza gaztetxoak jokatu zuen.
Oier Maiza- Xuban Lopetegi ziren faborito, eta ez zuten hutsik egin, txapelketa osoan egin ez duten bezalaxe. Sendotasun eta eraginkortasun handia erakutsi dute txapelketa osoa zehar, eta gaur ere halaxe izan da. Aimar Herasek, Oier Yarzaren laguntzarekin, haserako tantuetan eustea lortu badu ere, berehala aldeak egiten hasi dira Oier eta Xuban, eta amaieran garaipen erosoa lortu dute.
Joxi Lopetegi eta Mikel Uzkudunek, hurrenez hurren, eman zizkieten garaikurrak txapeldunei eta txapeldun-ordeei. Eta Ametsa Pilota Elkarteak, Klub irabazleari dagokion kopa jaso zuen Jean Louis Perugorria Urruñako ordezkariaren eskutik.
Arratsaldeko lehen orduan izan zen hori, baina goizean izan zuten beste hitzordu bat irurako xarelari gaztexeagoak, Arrangoitzen bertan. Topaketak zituzten, eta hiru pilotarirekin (Gibelalde, Calonge eta Garmendia) joan ziren Ametsakoak bertara, hango pilotariren batekin bi bikote osatzeko aukera izango zutelakoan, baina beste pilotaririk ez zegoenez, emandako hiru pilotarirekin bi bikote osatu behar izan genituen; Garmendia-Calonge batetik, eta Gibelalde- Garmendia bestetik.
Bi multzotan banatu zituzten pilotariak, eta Ametsako bi bikoteak lehen multzoan jarri zituzten. Gibelalde-Garmendia izan ziren irabazle jokatutako partidak irabaziz, eta Garmendia- Calonge bigarren postuan, Urruñarrak taldeko bikoarekin berdinduta.
Hauek ere garaikurrak jaso zituzten Ramuntxo Borteyru, Iparraldeko Ligako Xareko arduradunaren eskutik.
Amaitu da 20-21 Neguko Iparraldeko xareko txapelketa, eta Ametsa Pilota Elkarteak zorionik beroenak eman nahi dizkizue parte hartu duzuen Ametsako pilotari guztiei, erakutsitako maila bikaina izan delako. Hori da bidea, lanean jarraitzea, eta emaitza gehiago etorriko dira. Zorionak, halaber, astea joan astea etorri, mutilekin izan zareten guztioi ere.