Ametsako pilotariek Iparraldeko xare txapelketan, Gazte eta Gaztetxo mailan, asteburuan egindakoa izugarria izan da.
Ostiralean, Ametsa trinketean jokatu zen derbian, Zabalegi-Mujika bikoak 40-30 irabazi zion Mendizabal-Huitzi bikoari. Zabalegi-Mujika bikoa zen faborito, baina ez zion hasera ona eman partidari. Mendizabal-Huitzi bikoa, berriz, sendo eta eraginkor jokatzen hasi zen, eta haseran alde txikiak baziren ere, partida erdirako 17-25 aurreratu ziren Matxalen eta Gorka. Bazirudien ezustekoa izango genuela, baina 18. tantua egiteaz bat, Julenek eta Markelek, atsedena eskatu zuten, lasaitu -batez ere Julen- eta segidan 12-0 partziala eginda, 30-25 aurrea hartzea lortu zuten. Hemendik aurrera beste partida bat ikusi genuen; lortutako aldea handiagotzen joan ziren Julen eta Markel. Matxalen eta Gorka, berriz, ezinean aritu ziren partidaren azken zatian, ez beraien erruz, Julen eta Markelen erakustaldiagatik baizik.
Larunbatean, Oragarren(Nafarroa Beherea) zuten hitzordua irurarrek. Lehen partidan, ostiralean garaile izan ziren Zabalegi-Mujikak Amikuzeko Arhie-Tartas bikoaren kontra 40-8 erraz nagusitu ziren. Emaitzak erakusten du Ametsakoen nagusitasuna. Bigarren partidan, Isasa-Iturbe bikoak 40-30 irabazi zion Amikuzeko Arhie-Tartas biko berari. Partida hau lehiatuagoa izan bazen ere, Ikerrek eta Oierrek partida izugarririk egin gabe, erraz samar lortu zuten garaipena.
Igandean, bete-beteko xare eguna izan genuen Ametsa trinketean, eta Iparraldeko Ligako ligaxkako Gaztetxoen mailako azken jardunaldia jokatu zen.
Batetik, Ametsako 3 talde( Maiza-Lopetegi; Murua-Aristi; Larrañaga-Heras), eta, bestetik, Goizeko Izarrako talde bat eta Urruñarrak taldeko bi talde. 7 partida jokatu ziren, eta 7ak irabazi zituzten irurar pilotariek. Maiza-Lopetegik, bitik bi (40-18/ 40-25); Murua-Aristik ere bitik bi (40-18/40-39) eta Larrañaga-Herasek, hirutik hiru (40-33/ 40-22/40-32).
Ondorioz, Gaztetxoen mailako ligaxka amaituta, Ametsako hiru taldeak sailkapeneko lehen hiru postuetan sailkatu dira: 1. Maiza-Lopetegi 2. Murua-Aristi 3. Larrañaga-Heras.
Maiza-Lopetegi eta Murua-Aristi finalerdietarako zuzenean sailkatu dira, eta Larrañaga-Heras bikoak final-laurdenak jokatuko ditu Goizeko Izarrako bikoaren kontra. Bejondeiela!!! Zorionak!!!